「地道」星期五影院︰《慈禧秘密生活》

每星期搵套舊戲，等你周末匿喺屋企慢慢煲～

宮廷劇大熱都唔係新鮮事，早有大台《金枝慾孳》，近期有《深宮計》同《延禧攻略》，仲未計兩岸三地出品嘅出品，多到數唔哂，大熱原因？觀眾異常鍾情睇女人鬥女人囉！

「女人最大的敵人係女人」呢個主題成為唔少電影電視劇嘅軸心，不過宮廷主題電影，就好似冇幾多！最出名當然有大師級嘅李翰祥導演多套清宮主題作品，好似《垂簾聽政》、《火燒圓明園》等。而今日就同大家介紹下另一套清宮電影－1995年性感女神邱淑貞主演、劉偉強執導嘅 《慈禧秘密生活》。

慈禧太后歷史上係負面人物，垂簾聽政又獨權，手起刀落滅左唔少反對聲音。不過套戲叫得「秘史」就知道同史實無咩關係，比較似借題發揮，表現後宮明爭暗鬥荒淫一面。

故事講惠玉蘭（邱淑貞飾演）被選為貴人入宮，不過因為純真同家貧而不識宮中潛規則，唔識買通太監而長坐冷板凳。終於因為美貌而受到皇上寵幸，不過做人無手段連皇上都唔like佢，後宮班女人又妒忌佢可以侍寢而欺負佢，非常殘忍地煲左佢隻愛貓！傷心嘅玉蘭為左生存，決定擺脫純真，計算如何贏得皇上歡心，一步一步走上權力高位！

所以啲奸或者機心都係被逼出來嘅，當時邱淑貞係性感icon，只係力鬥其他妃嬪唔夠性感，所以加插左唔少情節俾佢行性感。例如為左討好皇上而去妓院學習床技、如何欲擒故縱吊皇上胃口等等，角色由純情少女變成蛇蠍女子。

90年代盛產唔少騷在骨子裡嘅性感女星，邱淑貞算係當中嘅表表者。當時亦都有唔少「少少鹹多多趣」嘅港產片，《慈禧秘密生活》當年就被評為三級片，電影有唔少juicy又香豔嘅場面，不過三點不露仲唔低俗添！